(六)22 曼城 vs 屈福特 曼城打底主場屈機

猪拉多纳

趁歐聯未踢搶得就搶

開季三連勝嘅曼城，今晚主場迎戰屈福特，「藍月亮」啱啱喺歐聯抽籤落入「死亡D組」，自然希望趁依家球隊強勢嘅時候繼續攞分「打定底」，等歐聯分組賽開波時可以專心應付歐戰，今晚面對開季3戰都係和波嘅屈福特，應該可以輕鬆擊敗對手，讓球主客和曼城雖要讓二球，但照捧讓球主勝。

（now 622周六晚10時直播）

曼城開季表現出色，球隊上仗擊敗愛華頓後創造咗跨季連贏9場英超，打破咗球會嘅紀錄。更不得了嘅係，「藍月亮」喺呢3場都冇失波，過往為人所詬病嘅防線表現得滴水不漏，加上一眾中前場球員近期都有「士哥」，球隊現時士氣旺盛，要贏波應該唔係難事。曼城啱啱喺歐聯抽籤被編入同祖雲達斯、西維爾同慕遜加柏嘅「死亡D組」，球隊自然希望喺進入歐聯分組賽階段時，已經喺英超大幅拋離競爭對手，咁就可以專心歐聯賽事，所以今晚對屈福特，贏波3分係志在必得。
屈福特輸質做炮灰

升班球隊屈福特首3場聯賽皆和波，球隊表現其實唔錯，而周中英聯盃喺全隊輪換嘅情況下，最終畀低組別嘅普雷斯頓淘汰出局。屈福特緣盡英聯盃對球隊未必係壞事，呢隊波兵源其實唔算充裕，要一班球員踢兩條戰線，隨時得不償失。不過，屈福特開季始終未贏過波，今仗仲要作客面對開季3連勝兼零失球嘅曼城，隨時變成「炮灰」，就算讓球主客和曼城要讓二球，都要撐讓球主勝。