修咸頓今非昔比捧唔諾手

猪拉多纳

今晚英超早場，修咸頓主場對諾域治，修咸頓過去兩季演出令人驚喜，但隨之而來係被豪門撬走主力，繼上季一次過將拉爾拉拿、洛夫雲、列基林拔出售畀利物浦之後，今季又將新星尼達利基尼同舒尼達連，分別賣畀紅軍同紅魔。人才嚴重流失，終於嘗到惡果，今季英超3戰仍未贏過，上周中喺歐霸盃附加賽又被淘汰。屋漏偏逢連夜雨，佐迪卡斯、賴恩貝特蘭、加斯頓拉美利斯全部養傷，巧婦難為無米之炊，任領隊朗奴高文點叻，但手頭冇籌碼，實難令球隊起死回生，雖有主場之利，但未必讓得起愈踢愈好嘅諾域治。
諾域治季初有團火

新升班嘅諾域治雖然首仗不敵水晶宮，但之後兩仗分別擊敗新特蘭同打和史篤城，並同喺英聯盃晉級，已適應英超比賽節奏。21歲中場列特文已有兩球進帳，演出充滿朝氣。

畢竟諾域治剛重返英超，球員心中團火仍然好旺盛，遇上今非昔比兼勢頹嘅修咸頓，正係搶分為留級打好好基礎嘅良機，力撐讓球客勝。

（now 621周日晚8時30分直播）