安圖法加斯達曳爆 讓唔起「康大」

猪拉多纳

智甲春今晚有筍嘢，就係尾二嘅安圖法加斯達主場迎戰「三哥」康塞普森大學，前者唔單止連場不勝，近年交手又畀康塞普森大學食住，竟然仲要讓波有冇搞錯？斯維唔信乜嘢陰謀論，一於捧受讓嘅康軍讓球客勝。

（周一凌晨2時開賽）

安圖法加斯達有幾曳？除咗開咧前贏過兩場智利盃外，自7月中聯賽連盃賽已經7場未嘗一勝，齋計主場更4連敗，令佢哋跌到落尾二位置，雖然陣中一對守將安普路同迪芬奴有機會趕及復出，或對防線有正面幫助，但最弊係安圖法加斯達火力極度疲弱，已連續5場食白果，斯維完全睇唔到佢哋短期內有任何反彈嘅可能性。
康塞普森大學新星博上位

相反客軍康塞普森大學早前喺南球盃早早被國民會踢出局，明顯想專注國內賽事，依家亦順利殺上「三哥」位，年輕前鋒特羅科索上仗聯賽對科布雷素，後備入替於末段整多粒贏盡掌聲，今仗大有機會擔正，仲唔乘機搶胡博上位咩，加上近4次碰頭「康大」2勝2和，試問近況曳爆嘅安圖法加斯達憑乜嘢讓波呢？康軍嘅讓球客勝咪錯過。