搶到W即掂威爾斯主場打晒色

猪拉多纳

歐國外B組威爾斯主場鬥以色列。威爾斯喺加里夫巴利領軍下愈戰愈勇，係B組唯一不敗之師，分組賽7戰5勝2和排榜首，以5分領先排第3嘅以色列，只要今場全取3分即可穩奪小組頭兩名，為殺入明年決賽周提早慶功。以色列上次主場都要淨吞威爾斯3蛋，作客更難爆冷，捧威爾斯1.78倍主W。

（有線64及203台周一凌晨零時直播）

威爾斯今屆外圍賽成績咁好，除咗多得射入6球嘅王牌加里夫巴利外，至今只失兩球嘅防線亦功不可沒，尤其主客兩循環對住當今歐洲攻力最強之一嘅比利時可以保持一球不失，絕對唔係符碌。
以色列作客例腳軟

以色列現時7戰得12分，除希望爭入前兩名直接出線，亦要頂住從後追趕嘅塞浦路斯及波斯尼亞、至少保住第3位打附加賽，不過以軍作客例腳軟，今屆所贏對手只係實力平平嘅塞浦路斯同魚腩安道爾，面對有迪斯高壓陣嘅波斯尼亞則輸1比3，要喺實力高一班嘅威爾斯身上偷雞唔容易。

首循環碰頭，威爾斯憑加里夫巴利梅開二度及艾朗藍斯嘅入球大勝3比0，今次有主場之利勝算更高。