奧地利強勢客窒瑞典

猪拉多纳

歐國外G組榜首大戰，排第2嘅瑞典喺主場恭候榜首奧地利。向來只係歐洲3線嘅奧地利，於今屆外圍賽表現令人眼前一亮，3場作客賽事更錄得全勝，高踞榜首可謂實至名歸。今輪佢哋將作客瑞典，不妨冷敲客勝。

（有線64及203台周三凌晨2時45分直播）

雖然奧地利多年嚟都唔係大賽常客，但今屆人腳絕唔失禮，包括鋒將夏歷、中場阿拿奧杜域、後衞基斯甸富治斯等3線主力均喺英超、德甲効力，加上拜仁慕尼黑球星阿拉巴傷愈復出，實力更見完整。值得一提嘅係阿拉巴對上3次鬥瑞典，兩次攻破對手大門，有呢位「瑞典殺手」幫忙，奧地利更添勝算。目前奧地利出線機會好大，士氣亦盛，作客瑞典未必會落於下風。
伊巴謙莫域上陣成疑

相反對手瑞典近年青黃不接，全靠射手伊巴謙莫域喺前線搵食，不過呢位前鋒上場傷出，今場上陣成疑，瑞典攻力大削。而且相比奧地利上仗係對弱隊摩爾多瓦，瑞典上場則要遠征俄羅斯消耗更大，更何況兩軍近3次交手，3次均由奧地利先開紀錄，證明奧軍球員攻破瑞典防線確實有一手，今場有力再次帶來驚喜，客勝值得捧場。