英格蘭「大」炮多轟散瑞士

猪拉多纳

深受香港球迷愛戴嘅英格蘭，今屆歐國盃外圍賽係威係勢，喺E組7戰全勝提前拎到決賽周入場券，今晚佢哋喺溫布萊主場迎戰小組排第2位嘅瑞士，一班受到質疑嘅前鋒已磨拳擦掌，朗尼亦講明要喺主場觀眾面前破國家隊入球紀錄，今仗對住鋒力唔弱嘅瑞士，2.05倍入球大值得支持。

（有線61及201周三凌晨2:45直播）

「三獅兵團」上場大炒聖馬力諾6:0，朗尼入波平咗卜比查爾頓49球入波紀錄，佢喺嗰場波下半場被換走，領隊鶴臣話明係想等佢今場再搏，呢位曼聯前鋒亦開到聲想喺「福地」完成壯舉，以佢連續6場外圍賽都有「士哥」嘅強勁走勢，今場入波機會絕對唔細。
朗尼誓破卜比Sir紀錄

除朗尼之外，禾確特、哈利卡尼兩位受到質疑嘅前鋒，上場都齊齊有入波，今仗梗係希望再接再厲啦，加上史達寧同阿歷士張伯倫都係射得之人，大炮絕對夠晒數！數據顯示，英格蘭同瑞士喺溫布萊球場交手例牌多波入，兩隊近5次對戰4次開大，其中2場就係喺溫布萊踢。

至於瑞士上周3:2力克斯洛文尼亞後，保住第2名出線嘅機會好大，射手祖斯比迪米斯入球能力不容忽視，「新美斯」梳頓沙基利亦係「三獅兵團」心腹大患，以佢哋喺分組賽7場入16球嘅鋒力，要撕破英格蘭唔太穩陣嘅防守唔難，今場有可能又係大手交易。