巴勒莫 卡比做「細」界

猪拉多纳

意甲開咧兩戰全勝嘅巴勒莫，教練伊亞真尼成功打造穩固防線，可惜前線冇咗保羅戴巴拿孭飛火力大減，今晚迎戰好大機會死守搶分嘅卡比隨時老鼠拉龜，1.74倍「入球細」玩得過！

（TVB301周日晚9:00直播）
「傻豹」鋒力麻麻

「傻豹」巴勒莫開咧兩場都係煲魚生粥險勝1:0，係今季意甲唯一冇失過波嘅球隊，伊亞真尼嘅防守戰術的確好穩陣。不過今晚佢哋喺主場鬥降班熱門卡比，有冇本事喺對手身上攞到着數都成疑問，原因係王牌前鋒保羅戴巴拿轉投祖雲達斯後，巴勒莫簽入33歲嘅基拿甸奴頂替明顯差幾班，原本被寄予厚望嘅法蘭高華斯基斯又未上力，想入多球都有難度。

至於被睇死會做升降機嘅意甲「新丁」卡比，開季係就係連輸兩場，但上仗僅以1:2輸畀國際米蘭場波鬥志滿分。今戰明知技不如人，好大機會死守以1分為目標，以巴勒莫嘅鋒力好難破到密集，入球細抵捧啦！