車仔借細反彈

猪拉多纳

今晚英超早場爆發倫敦打吡，由衞冕嘅車路士主場硬撼阿仙奴。車仔開咧後堅唔順，聯賽5戰狂失12球，激到主帥莫連奴紮紮跳，況且喺季前嘅社區盾又輸過畀「兵工廠」，今仗雖然好想反彈以追番啲分數，但首要任務仍然係要先做好防守，至於阿仙奴王牌阿歷斯山齊士開季仍未開齋，剛於歐聯新敗亦唔敢輕舉妄動，雙方近年交手都踢得小心謹慎，之前6次對賽5度開細，1.93倍細盤值得再追。

（now 621周六晚7時45分直播）
阿仙奴雙箭欠銳利

車路士聯賽5戰輸咗3場，創出自98年以來最差的開季成績，主帥莫連奴形容為他領隊生涯最差開局。車仔主帥「寸王」莫連奴一向防守大過天，但今季聯賽打咗5仗竟然咗失12球，非常罕見，以泰利、加利卡希爾、伊雲洛域為首嘅防線跌晒Watt。「寸王」當然唔會睇唔出問題所在，於是喺周中歐聯對弱旅特拉維夫馬卡比作出調整，讓艾斯派古達重操故業踢右閘，新加盟嘅艾度巴巴扼守左路，明顯係針對水準大跌嘅伊雲洛域，最終大勝4比0，今季首度保持清白之身，呢個調動收效，標誌車仔引以為傲嘅「藍大巴」經過「搶修」後，終於可以「再次出廠」。

阿仙奴今季獲得車仔鋼門施治來投，後防穩定度大幅提高，聯賽5戰只失3球，近3仗更冇失波，證明有呢位捷克鋼門壓陣，確能予人較大信心。不過「兵工廠」王牌阿歷斯山齊士腳風欠順，至今尚未開齋，另一箭頭基奧特表現飄忽，進攻冇以往咁銳利，況且周中歐聯作客爆冷不敵薩格勒布戴拿模，對眾將信心點都有影響，就算季前主區盾贏過車仔，令主帥雲格打破11年來對「寸王」不勝魔咒，今仗亦唔敢輕舉妄動。
近季對戰少見入球騷

翻查資料，車仔近季對阿仙奴鮮有出現入球騷，雙方之前6次對賽開出1大5細，唯一一場開大係去年3月雲格領「兵」第1,000場之役嚴重失準，作客慘吞車仔6蛋。依家車仔正值低潮，有傳中前場主力韋利安同柏度洛迪古斯齊齊倦勤，必定穩陣行先，撞正新敗嘅阿仙奴，預計兩軍都唔會冒險搶攻，入球唔慌多，細盤有1.93倍有買趁早。