多蒙利華對攻大火併

猪拉多纳

10戰全勝 Vs 新援爆發

德甲重頭戲，榜首多蒙特主場鬥利華古遜，開季三線作戰10連勝嘅多蒙特氣勢如虹，而且冇被勝利沖昏頭腦，一路贏一路自我檢討，態度正面！遇上啱啱喺歐聯強勢反彈，仲有三名新援集體爆發嘅利華古遜，會係一場對攻好戲，大盤係投X首選。

(now 672、有線61及64台周日晚11時30分直播)
杜曹掛住攻 防線係咁失

多蒙特開咧至今全勝，三線作戰10戰共轟入36球，全世界對佢哋讚不絕口，不過剛周中歐霸盃主場艱難擊退俄超球隊卡斯洛達後，新帥杜曹同隊長曉姆斯都公開表示，球隊表現唔合格，佢哋需要踢得更具侵略性。不過黑柴覺得佢哋問題喺防線，杜曹將整條中場線谷得太上，搞到防線空位太多，遇上快速反擊球隊，隊長曉姆斯左右包抄搞到疲於奔命，佢哋近6場正式比賽失咗9球，連挪超奧特足球會喺兩回合賽事都入到佢哋5粒，上輪聯賽主場對漢諾威，客軍全場5次射門都入咗兩球，不過杜曹對呢個問題完全冇面對，睇嚟多蒙特未來賽事都會繼續入得又失得。
利華三新兵 歐聯打滿分

利華古遜經過聯賽兩連敗後，上周中於歐聯4比1大炒巴迪一吐烏氣，而且三名新援同時爆發，來自弗賴堡嘅美密迪開波唔夠4分鐘入波，刷新球會喺歐聯最快入球紀錄；「小豆」查維亞靴南迪斯亦成功入波開齋，至於多蒙特來投嘅奇雲甘保爾亦喺邊線踢到曉飛，賽後呢三位新援同時獲德國《圖片報》畀滿分，球會體育總監禾拉亦話用賣走孫興民嘅3,000萬歐元嚟換取呢三位新兵絕對賺咗。今晚乘勢作客西法倫球場唔會縮，大盤穩陣。