波圖賓菲加大廝殺

猪拉多纳

葡超今晚上演「國家打吡」，波圖主場迎戰賓菲加，今季冠軍寶座相信都係呢兩隊爭。波圖雖然賣走射手積臣馬天尼斯，但阿布巴卡成功代替到佢位置，火力仍然強勁。賓菲加要衞冕成功亦冇得退縮，一於捧入球大。

（周一凌晨2時15分開賽）
阿布巴卡撻着

雖然波圖年年賣走主力，但總會有人頂上，繼續保持實力，上季加盟嘅喀麥隆前鋒阿布巴卡，原本唔多起眼，但積臣馬天尼斯離隊後，佢獲得更多上陣時間即大顯身價，上仗歐聯梅開二度，4場聯賽亦入咗4球，真係勒都勒唔住。

賓菲加中前場人腳亦鼎盛，射手莊拿斯干卡維斯喺聯賽已有5球進帳，奧斯華度加坦、美度古輪流發威入波，令賓菲加近3仗狂入11球，就算波圖有卡斯拿斯把關，恐怕都招架唔住。入球大有2.15倍，的確抵玩。