又歎私房菜 紅軍嗒得杯諾

猪拉多纳

利物浦開季兩連勝，以為好掂，點知跟住就連續4場不勝，利迷間又響起「反羅」聲音，要求領隊羅渣士下台，紅軍今晚主場對「金絲雀」諾域治，係羅渣士叫球迷收聲嘅最好機會，事關睇番對賽往績，諾域治簡直係紅軍嘅「私房菜」。利物浦對上5次對諾域治錄得全勝，今場一於再捧主勝！

（now 622周日晚11時直播）

利物浦喺周中歐霸分組賽作客賽和波爾多一仗收起賓迪基、羅拔圖法明奴、占士米拿等主力，留晒力就係等今場，加上今場有中場發電機菲臘比古天奴刑滿復出，盛傳養傷多時嘅史杜列治更有望登場，紅軍火力大增，諾域治今場有難咯！
諾域治近5對戰盡墨

紅軍過去5場贏諾域治，大部分要歸功於超級屈機嘅蘇亞雷斯，紅軍喺呢5場一共入咗21球，「蘇神」一個人就包辦咗12球，冇咗「蘇神」，諾域治仲係唔係紅軍嘅「私房菜」呢？

科娜就咁睇，雖然冇咗「蘇神」，但紅軍贏咗咁多次，心理上佔盡優勢，況且球隊依家急需一場勝仗重上勝軌，戰意鮮明，主場面對升班馬諾域治，真係冇得唔贏呀！「金絲雀」防守唔算太強，對修咸頓同水晶宮都要失3球，紅軍球員有嘅係質素，只要發揮正常，應可順利贏波而回。