聯手做細界

猪拉多纳

皇馬巴塞馬體會

歐聯前夕，西甲三雄齊做「細」界！皇家馬德里射手C朗忽然死火，主場難炒馬拉加。巴塞隆拿剛經歷大敗，急忙補救防線，必然打醒十二分精神，避免再甩漏，主場小勝拉斯彭馬斯居多。馬德里體育會作客維拉利爾，屬五五波之爭，雙方近五次交鋒全開細，一於再追。
馬拉加大巴招呼艦隊

皇馬球星C朗自上輪歐聯對薩克達大演帽子戲法後，回師西甲近兩場都食白果，似乎中咗「紀錄魔咒」，事關佢只要再入一球就可以取得職業生涯第五百球，但遲遲未得手，睇嚟呢個心理關口唔易破。而且「銀河艦隊」皇馬下周中歐聯作客馬模，教練賓尼迪斯應會錫住班主力，今仗未必搏盡。

至於對手馬拉加，今季五場聯賽未入波，但亦只失三球全開細，皆因球隊人腳質素有限，教練加西亞只能採取「死守突擊」，其中作客巴塞隆拿成功封殺「MSN」美斯、蘇亞雷斯、尼馬，戰至尾段先至被華美倫攻破大門，雖敗猶榮。今仗鬥皇馬，馬拉加應會再「泊大巴」實行輸少當贏，入球大細中位數為3.5球，必追細盤。

（now 632周日凌晨零時15分直播）
巴塞留力歐聯冇鑊氣

巴塞隆拿上仗1比4慘敗於切爾達腳下，防線問題又敲起警鐘，教練安歷基今仗首要工作係執好後防，起碼要保持清白之身，以免再招人話柄。「地上最強」下周中歐聯迎戰德甲勁旅利華古遜，今場聯賽對新升班嘅拉斯彭馬斯，有大條道理輪換主力。不過，拉斯彭馬斯並唔好恰，開咧戰作客馬體會僅輸0比1，上仗更以2比0擊敗另一歐聯分子西維爾，防線頂得兩嘴，巴塞要咬入佢哋並唔容易，大細中位數3.5球再敲細盤。

（now 632周六晚10時直播）
馬體會潛艇專報細數

馬體會下周中對賓菲加前，今晚先作客「黃色潛艇」維拉利爾，雙方實力不相伯仲，過去五次交手除咗一次打和1比1之外，其餘四次總入球都係一球。事實上，馬體會由施蒙尼執教後特別注重防守，今季六場比賽五仗冇失波，預料今場屬於拉鋸戰，入球細熱爆有道理。

（now 632周日凌晨2時30分直播）