大米蘭時代重捲意甲

猪拉多纳

意甲近幾季都由祖雲達斯壟斷，都靈市成為意大利足球焦點，米蘭市於羅馬市及那不勒斯市之後淪為第四勢力；不過米蘭雙雄大搞革命，國際米蘭大肆增兵，AC米蘭亦令人意外地找來「國米人」米赫洛域搞重建，兩軍表現令人刮目相看，且看能否復興成功，重現2011至2012年球季「大米蘭」風光，重新主宰意甲！

今晚意甲壓軸尾場爆發榜首大戰，由「一哥」國際米蘭主場硬撼次席「紫百合」費倫天拿，亦係兩大型男主帥文仙尼同保羅蘇沙正面交鋒，咁蹺兩人都係倒戈舊東家，而祖維迪、菲臘比美路亦要向「紫百合」倒戈一擊；國米開咧五戰全勝弗到震，主W值博。

（TVB 301周一凌晨2時45分直播）

今仗焦點除咗係兩軍爭做「領頭羊」之外，亦係雙方型帥文仙尼同保羅蘇沙證明實力，唔只得個樣。文仙尼憑2001年執教費倫勇奪意大利盃起家，繼而轉投國米及曼城等豪門奠定名帥地位。雖然「紫百合」係保羅蘇沙首間執教嘅意甲球隊，但佢於球員時代曾効力祖雲達斯及國米，對意甲一啲都唔陌生。睇埋國米幾名新兵祖維迪、菲臘比美路同拿積，都係於費倫天拿打出名堂，今仗堪稱「倒戈之戰」。

自2010年榮膺三冠王後，國米極速下滑，今季連歐霸都冇份踢，可專心爭逐聯賽錦標；文仙尼深明於意甲防守大過天，因此今季整頓防守體系，新加盟嘅祖奧米蘭達、菲臘比美路、阿歷士迪尼斯均屬硬淨悍將，配合原有嘅古亞連同加利美度，呢度中後場屏障成為國米今季突飛猛進嘅關鍵。球隊開咧五戰全勝僅失一球排「冧巴溫」，創下球隊四十九年來最佳開局。
贏一粒收工 捧埋讓球和

費倫天拿開季五戰四勝僅一敗做「二哥」，輸畀拖連奴之役明顯發波瘟，領先下連失三粒，反映守將唔夠集中，撞正防線主力柏斯哥勇戰受傷要抖一個月，加上嚟緊周中要打歐霸作客比蘭倫斯，所以今仗絕不樂觀。國米聯賽五連勝場場贏一粒收工，除1.68倍嘅主W之外，不妨再追有3.3倍嘅「讓球和」。