「黑雙煞」開火！西布朗下盤嗒「糖」

猪拉多纳

今晚有場英超獨腳戲，西布朗主場恭候愛華頓，牌面上「拖肥糖」值得秤先，弊在倒戈射手盧卡古最近腳風麻麻，後防支柱史東斯又傷埋，攻守兩瓣都信唔過喎！相反，西布朗有呢對「黑雙煞」─「浪子回頭」射手比拉希奴、「貴嘢」荷西朗頓掛帥攻堅，火力夠晒保證，受讓平半玩1.77倍下盤。

（now621台周二凌晨3:00直播）
愛華頓攻守主將唔踢得

新季英超只係輸過畀曼城嘅愛華頓，表現係幾硬淨，之不過今晚造訪西布朗有唔少隱憂，先係史東斯喺上周中聯賽盃傷出後，膝頭哥傷勢堅大鑊，領隊馬天尼斯講明唔敢冒險派佢落場。更何況比利時「魔獸」盧卡古自從8月中對修咸頓梅開二度後，至今仲未喺聯賽「士哥」，攻擊中場米拿拉斯又話要坐波監，攻守兩瓣都畀唔到人信心。
西布朗主力抖夠搏殺

主隊西布朗王牌射手比拉希奴，轉會失敗後用入波贏番球迷愛戴，聯同破球會轉會費紀錄加盟嘅荷西朗頓，亦有唔少火花出現，有呢對「黑雙煞」衝鋒陷陣，「拖肥糖」後防都咪話唔危。況且佢哋簽入莊尼伊雲斯後，防線明顯穩健咗，周中聯賽盃慘吞諾域治3蛋皆因輪換太多，個陣面目全非，領隊佩尼斯今鋪派番一班正選落場，養精蓄銳梗係要喺自己地頭做番齣好戲，隨時攞晒3分都唔奇喎。