加拉塔沙雷教訓歐聯新丁

猪拉多纳

歐聯分組賽C組賽事，哈薩克球隊艾斯坦拿呢支歐聯新丁，今晚首度喺主場出擊，迎戰土超球隊加拉塔沙雷。兩隊喺分組賽首輪都輸波，但加拉塔沙雷實力始終比艾斯坦拿高幾班，加上後者近況平平，加拉塔沙雷今仗就算作客都有力取得分組賽首勝，讓球盤小讓平半阿謙推介上盤。

（有線61及64台周四凌晨零時直播）
讓得起艾斯坦拿平半

艾斯坦拿既係歐聯新丁，又係一支充滿神秘色彩嘅球隊；呢隊波成立只係九年，但由於獲當地雄厚財力支持，所以球隊可以羅致一班喺塞爾維亞、克羅地亞同比利時嘅聯賽搵食嘅球員加盟，令球隊實力有所提升。艾斯坦拿係史上首支躋身歐聯分組賽嘅哈薩克球隊，球隊上仗作客雖然輸畀賓菲加，但半場成功守和對手已有交代，但踢完呢場波之後，艾斯坦拿近三仗都贏唔到，似乎仲未回氣，今晚主場面對加拉塔沙雷繼續有前鋒迪禾馬斯停賽，攻力受損未必可以打開勝利之門。

加拉塔沙雷上仗主場不敵馬德里體育會實屬技不如人，但呢支土超班霸實力始終唔曳；球隊今季引入兩位德國前鋒普多斯基及哥斯基奧斯，雖然後者因轉會手續問題要到明年一月先可上陣，但影響唔算太大。加拉塔沙雷近兩場聯賽都贏波，可見球隊已走出輸畀馬體會嘅陰霾，今仗雖有中場咸美艾天托普因傷唔踢得，喀麥隆後衞捷祖剛好番亦未必會正選上陣，但以球隊近期嘅氣勢，作客面對歐聯新丁艾斯坦拿絕對有力反客為主，今仗讓球盤加拉塔沙雷小讓平半，阿謙一於撐上盤。