切爾達遇弱又起菲

猪拉多纳

今晚有成卅幾場波，阿King就睇中幾場直播賽事，其中切爾達主場對基達菲係重心推介。切爾達開季表現理想，前仗更喺主場以4比1大破巴塞隆拿，上場作客雖逼和弱旅伊巴失分，但客戰始終非切爾達強項，今仗回師主場面對作客腳軟嘅基達菲，相信又係「起筷」時候，切爾達可以炒番場。

（now 632周六凌晨2時30分直播）

切爾達開季表現可人，踢咗6場聯賽攞到4勝2和嘅成績，當中以擊敗兩支出戰歐聯嘅球隊西維爾同巴塞隆拿表現最出色。切爾達前線主要倚重洛尼圖同伊亞高艾斯巴斯，呢兩位球員今季成日入波，所以令切爾達依家可以排喺聯賽榜第4，可想而知佢兩個對球隊有幾重要。切爾達今仗有門將魯賓白蘭高、後衞方達斯同中場奧古士圖費南迪斯有傷唔踢得，但球隊主場表現唔錯，有望再大勝一仗。
基達菲作客3戰全敗

基達菲開季6戰2勝4負表現一般，2場勝仗都係喺主場攞到，作客則3戰全敗，可見球隊客戰完全唔掂。基達菲上仗以3比0擊敗利雲特，射手艾華路華斯基斯梅開二度，但今仗面對切爾達相信唔會咁易再入到波，再加上後衞羅拔圖拿高因傷缺陣，呢場作客相信都係凶多吉少。
法甲里爾啞火追細盤

其餘賽事，法甲嘅里爾近4仗只係入得1球，尤其係連續兩場輸波都入唔到波，可見呢隊波攻力非常疲弱，面對啱啱喺聯賽開齋嘅蒙彼利埃，相信都唔會咁易有士哥，一於捧細盤。

（TVB 302周六凌晨2時30分直播）

最後美職嘅華盛頓聯隊早前因分心中冠盃而令聯賽成績未如理想，但球隊已經喺中冠盃分組賽出線，可以專心應付聯賽，遇上3連勝嘅紐約城相信入波唔會少，一於捧大盤。

（TVB 301周六早上7時直播）