飛腳班齊兵反嗒天鵝

猪拉多纳

盃賽主場往績贏晒

同首回合相比，今日兩場日聯盃4強次回合生死戰嘅賠率，顯然正常得多，所以唔使疑神疑鬼，就咁跟實力強弱買波，好似大阪飛腳主場對新潟天鵝咁，除非飛腳唔想爭冠軍，否則個1.82倍主W開梗。

（有線61、201周日下午1:00直播）
中場里奧施華停賽

天鵝冇反擊本錢

咁睇好首回合落後1:2嘅飛腳，原因係嗰場波佢哋根本係讓晒車馬，唔只宇佐美貴史等4件國腳，跟咗日本男足去踢世界盃外圍賽，遠藤保仁、今野泰幸等4個主將，都以賽程太密做理由休戰，如果計埋傷出換人，飛腳嗰陣隊波同早個禮拜聯賽時對川崎，足足有9個調動，話佢哋用二線隊應酬一啲不為過，輸波係好正常嘅事。

今場情況就完全唔同嘞，飛腳仲係想爭日聯盃兩連冠嘅，根本唔使擔心佢哋又hea踢，遠藤保仁嗰批老鬼抖咗幾日，已經確認今場波會出嚟搏殺。況且飛腳主場對新潟嘅賽績真係好靚，自2001年起十幾年嚟攞到8勝4和1負，當中兩場盃賽對戰，包括喺日聯盃同日皇盃，飛腳都係主場派蛋贏出，呢個傳統睇怕會延續。

最重要一點係，上場兩隊各有1人被逐，飛腳係守衞金正也，新潟係中場里奧施華，計起嚟，大家都有一件停賽，始終係新潟傷啲，施華呢件8號仔雖然今季聯賽只入1球，但係隊波打反擊嘅重要本錢，冇咗佢，新潟今場只能夠死守睇吓頂得幾時，咁被動唔輸有鬼咯。