普利茅夫開火射爆諾士郡

猪拉多纳

今晚係國際賽之夜，但英乙繼續有波踢，當中升班熱門普利茅夫會造訪諾士郡。普利茅夫最近連贏3場，首席射手積維斯入波當食菜，平手盤梗係捧1.95倍嘅普利茅夫！

（TVB301周日晚9:30直播）

狼隊青訓產品積維利今季披甲12次入7粒，中場拍檔格拉咸卡利亦唔講得笑，今季聯賽已經有5球進帳，兼當選英乙8、9月最佳球員，有呢對攻擊孖寶衝鋒陷陣，火力夠晒猛。
諾士郡後防主力避戰

雖然諾士郡近4場主場贏晒，不過佢哋最近連輸兩場，走勢回落不特止，最大鑊係守將希頓賀利斯坐波監，門將卡路爾又因為要代表北愛爾蘭出戰國際賽未能候命，加埋後防大將阿倫舒漢養緊傷，後防穿晒大窿，點同普利茅夫鍊呀？