紐約城無心戀戰奧蘭多得米

猪拉多纳

美職常規賽殺入最後直路，聽朝兩場先開波嘅有奧蘭多城主場對紐約城，前者喺東岸排第7，仲有些微機會爭入季後賽，紐約城則排東岸第8位，落後第6位嘅蒙特利爾衝擊8分，數字上已經無緣季後賽，所以今場梗係捧戰意鮮明嘅奧蘭多城贏波啦！

（TVB 301周六早上7時直播）

紐約城今季雷聲大、雨點小，引入嘅3大巨星林柏特、派路同韋拿都未能幫球隊爭取佳績，僅得「狂牛兵」韋拿叫做交到貨，迄今一共取得16個聯賽入球。由於球隊未能打入季後賽，韋拿透露好可能以借將身份重返歐洲：「我收到來自各方嘅電話，詢問關於租借一事，但好多嘢都未落實。」韋拿個心已經飛咗去第二度，可以預計紐約城其他球員都係同韋拿咁無心戀戰。奧蘭多城喺常規賽剩番兩場波，今場係佢哋最後一場主場賽事，球隊依家落後第6位嘅蒙特利爾衝擊4分，所以今場對紐約城非勝不可。奧蘭多城近4場全勝，今場當然要再追！
地震細「肯」定有計

尾場西岸大戰聖荷西地震主場對肯薩斯體育會，地震排西岸第6，同第7但打少一場嘅波特蘭伐木者同分，地震今場當然要搶分，但對手肯薩斯體育會近排防守不俗，近4仗全開細，攻力唔強嘅地震難攻破對方大門，今場捧細仲啱數。（TVB 301周六早上11時直播）