鴨巴甸博反彈同羅斯郡駁火

猪拉多纳

人有三衰六旺，球隊亦一樣，好似開咧後頭威頭勢嘅蘇超一哥鴨巴甸，國際賽期前失驚無神大跌Watt連輸三場，佢哋梗係急求贏波博反彈喇，今晚蘇超獨腳戰作客撞正火力強勁嘅羅斯郡，隨時合演入球騷，阿King捧大盤。

（周六凌晨2時45分開賽）

自從死敵格拉斯哥流浪因財困降班後，些路迪便於蘇超橫行無忌，連奪四季聯賽冠軍真係悶到嘔，不過今季情況有啲唔同，老牌球隊鴨巴甸乘住「綠白軍團」季初略為走樣，豪取8連勝登上榜首。可惜呢類中型班向來打道氣，自9月尾蘇聯盃爆冷吞蘇冠仔喜伯年兩蛋踢出局後，接住兩場聯賽又輸畀恩華尼斯同聖莊士東，道氣畀人打窒晒，好彩適逢有國際賽期畀佢做調整，預計表現會有所改善。

不過羅斯郡亦唔係善男信女，之前6場聯賽僅一敗，仲喺蘇聯盃狂數福爾柯克6粒，前鋒利姆保斯近4仗怒轟6球，腳風順到冇朋友，撞正急求反彈嘅鴨巴甸，相信鬥攻格局，揀大冇衰。
柏達邦搵艾芬保都冇用

德乙方面，尾4嘅柏達邦主場對第4嘅布倫瑞克，柏達邦啱啱搵咗德國名宿艾芬保接手執教，但「老虎」從未教過職業球隊，邊有咁快執掂隊波，相反布倫瑞克聯賽作客3連勝，對住近3仗冇士哥嘅柏達邦值得秤先。

最後阿甲颶風隊主場對沙米恩圖，前者守強攻弱，尤其初段極度保守，之前9仗有8場開半場和，沙米恩圖中場施巴斯坦隆拿刑滿復出，佢哋近8仗亦開咗6鋪半和，不妨追多鋪。