曼城啃唔落西維爾

猪拉多纳

踢歐聯例腳軟兼殘陣

「藍月亮」曼城近期紅爆全球，並唔係因為近兩場英超錄得大勝，而係中國國家主席習近平即將到訪呢間土豪球會！不過「藍月亮」今晚想喺歐聯賽場「發光發亮」，就真係有啲難度喇，事關佢哋喺D組主場迎戰上屆歐霸盃冠軍西維爾，曼城喺國內蝦蝦霸霸，去到歐聯就變病貓，今場仲要冇埋阿古路同大衞施華，西維爾受讓要捧呀！

（有線62及202台周四凌晨2時45分直播）

曼城最近3連勝，上場喺聯賽大炒般尼茅夫5比1，好似證明咗即使球隊喺國際賽後中咗「FIFA病毒」、即使冇咗兩大進攻核心阿古路同大衞施華，「藍月亮」都一樣咁掂喎，仲有人孭飛，佢哋就係史達寧同韋菲特邦尼嘞！
史達寧邦尼未夠班孭飛

科娜當堂嚇一跳，然後得啖笑，佢兩個上場係好威呀，史達寧大演帽子戲法，邦尼亦梅開二度，不過對手係英超升班馬般尼茅夫，同今場對手西維爾相比，實力冇差九條街咁遠，都有七、八條街啩，況且佢兩個出盡風頭，西維爾實盯死佢哋，史達寧出名埋門把握力麻麻，邦尼就有射術但冇乜速度，要守住佢哋唔難喎！

最攞命嘅係，曼城呢班波去到歐聯例牌腳仔軟，上季都試過喺歐聯分組賽主場和羅馬1比1、不敵莫斯科中央陸軍1比2，今季就喺死亡D組主場輸畀祖雲達斯1比2，上場歐聯作客被視為組內最弱嘅慕遜加柏，唔係阿古路喺90分鐘射入12碼，「藍月亮」都贏唔到波喇！西維爾近況有起色，仲贏過巴塞隆拿添，上場西甲作客係和咗伊巴，但正選陣容收起高路比恩卡、高恩迪利等主力，攞明係為今場留力，受讓捧得過呀！