錘仔幫再扑巨人

猪拉多纳

「曼市打吡」星期日晚先有得睇，今晚就睇住場「倫敦打吡」頂住癮先喇！由韋斯咸主場大戰車路士。「錘仔幫」今季化身「巨人殺手」，連贏阿仙奴、利物浦同曼城3支Big5勁旅，認真得人驚。對手車路士依家狀態士氣都好沉，今仗作客莫講話想做「進擊的巨人」，簡直係唔輸已經要還神。韋斯咸有得受讓咁筍，1.87倍嘅讓球主勝冇理由唔捧場！

（now 621周六晚10時直播）
迪哥好難再屈機

車仔領隊莫連奴平時得罪人多稱呼人少，又成日寸寸貢，見到今季佢帶車仔帶到咁曳，相信大把人勁心涼呀。依家「寸王」最大危機係班兵唔聽佢支笛，尼曼查馬迪、奧斯卡杜斯山度士、艾斯派古達等人都不滿「寸王」喺球員面對直斥佢哋，依家連王牌夏薩特都畀莫連奴鬧埋一份，雖然球隊成績曳，最大責任當然係喺班球員身上，但佢哋堂堂球星，有錢又有面，當面畀人話掂，又點會吞得落呢啖氣？

班兵唔為莫連奴賣命，狀態好難踢得番起，再加上佢哋周中先飛完去烏克蘭踢歐聯分組賽，對住基輔戴拿模都贏唔到，狀態同士氣持續低迷。今場作客韋斯咸有前鋒雷米、翼鋒柏度洛迪古斯、後衞伊雲洛域同門將泰拔高圖爾斯缺陣，就咁睇好似後三者缺陣嘅影響大啲，但其實雷米亦都好重要，迪亞高哥斯達今季冇得好似上季咁屈機，敵方後衞肯定盯死佢，冇咗雷米，唔係靠「廢廢地」嘅法卡奧入波呀？
防守出色高效反擊

韋斯咸現時以17分高踞聯賽榜第4位，球隊自從由比歷執教後持續進步，最大特色係遇強愈強，對住強隊往往憑出色防守頂住對手強攻，再靠由皮耶、迪亞法沙高同域陀摩西斯嘅進攻組合作高效突擊，今季作客連贏阿仙奴、曼城同利物浦3支豪門，絕對唔係符碌，雖然域陀摩西斯限於借用條例唔可以上陣倒戈，但另一攻擊手安拿華倫西亞傷愈復出，相信韋斯咸可以繼續扮演巨人殺手角色。更何況今仗有主場之利，死吓死吓嘅車路士隨時成為第4支被錘仔扑親嘅Big5「巨人」，讓球主勝值得捧場。