國米啞火細盤博得過

猪拉多纳

意甲周中開快車，國際米蘭今晚率先作客博洛尼亞。國米連續四場聯賽失分後，教練文仙尼壓力愈來愈大，今仗鬥下游弱隊博洛尼亞實在不容再失。無奈「藍黑兵團」今季死晒火，想入波都唔易，就算贏估計都係小勝居多，寧願揀入球細。

（TVB 301周三凌晨3時45分直播）

國米曾於開季後連贏五場，睇落係威係勢，但近四仗只有三和一負，好大程度上因為攻力欠佳，九場聯賽僅入九球，成為前十三位球隊之中，唯一入波數字仲係單位數嘅球隊，令人失望。上季首席射手莫路伊卡迪表現走晒樣，季初大勇嘅祖維迪近期亦受傷患困擾。國米近三仗所入兩球，都係由比列錫包辦，但始終獨力難支，國米難倚靠呢位克羅地亞國腳搵食救成隊。
博洛尼亞冇料主攻

博洛尼亞今季重返意甲，表現明顯唔夠班，踢九場聯賽已輸咗七場，上仗能夠以2比1擊敗另一支新升班球隊卡比，全因卡比上半場已有一人被逐，博洛尼亞人多恰人少之下，都要踢到補時先至驚險反勝，表現令人不敢恭維，今仗遇上國米，相信博洛尼亞應會主守，博攞一分收貨，今場開入球細機會高。