落難戰車無力破城

猪拉多纳

內憂外患立立亂

今晚上演英格蘭聯賽盃16強，其中衞冕冠軍車路士作客史篤城。雖然車仔向來破「城」有一手，之不過家陣呢部落難戰車內憂外患不斷，主帥莫連奴更加傳出魷魚香，成班波仲邊有心機爭盃仔先？不如博有主場之利嘅史篤城不敗好過，1.82倍「讓主」有買趁早。

（開賽時間：周三凌晨3:45）

莫連奴過往無論教邊隊波都好，去到第3季硬係會出事，呢次回巢車仔亦唔例外。聯賽10戰過後「藍戰士」竟然排喺第15位，歐聯G組亦僅排第3，難怪英國《每日郵報》爆料，話班高層認為寸王已經失去更衣室控制權，有意搵安察洛堤或希丁克接手。更有消息聲稱，嚟緊喺周六主場鬥利物浦一戰賽果，會決定寸王去留添。
寸王辱罵球證周身唔掂

內憂未平，外患又起。據了解，寸王喺上仗領軍出戰韋斯咸嗰陣，喺中場休息時曾辱罵球證莫斯，事後莫斯將呢件事寫入報告提交畀英足總，怕且佢日後有手尾跟都未定，話唔心煩就假咯。就算守將加利卡希爾、前領隊安察洛堤開到聲撐佢，莫帥都幾難唔分心喎。
史篤城狀態弗防線穩

況且對比起周末場生死戰，衞冕英聯盃重要性似乎冇咁高。預料車仔今仗會同上圈賽事一樣，派出「頹虎」法卡奧、小將羅拔堅尼地呢類副選出戰，以班波近6仗僅1勝嘅差勁狀態，好難撐得落手啫。

相反史篤城狀態可靠得多，佢哋近5戰贏4場僅失3球，就算中堅謝夫甘馬倫打柴，好彩鐵衞梳爾哥斯有望復出，防線夠穩陣，主帥曉士賽前揚言依家係迎戰對手嘅最好時機。以藍戰士今季8場作客勁失15球嘅防線嚟睇，隨時輸埋都唔奇喎。