多蒙特三叉戟撻着 柏達邦大件事

猪拉多纳

多蒙特今晚喺德國盃第2圈主場迎戰柏達邦，入球大細中位數開到3.5球都要玩1.7倍入球大！事關多蒙特近排強勢復活，進攻「三叉戟」輪流着火，根本冇辦法招架得住，撞啱對手柏達邦搵艾芬保接手執教後，突然翻身識入波，帶挈大家收錢唔奇喎。

（TVB13周四凌晨2:00直播）
奧巴美揚開咧10戰轟13粒

今季多蒙特喺新教練杜曹領軍下，可以話強勢復活，雖然佢哋經歷過一段低潮，好在進攻三叉戟好快撻番着，日前隊波喺德甲主場5:1打沉奧格斯堡後，更加連贏3場，而且射手奧巴美揚上場連中三元，開咧10場聯賽轟13球，仲打破埋隊史開季最多入球紀錄，信心梗係爆棚啦！

仲有呀，中場香川真司已經重拾個人最佳狀態，雖然佢入球數字唔及以往咁多，但上場佢交出3次助攻，暫時以5次助攻位列德甲助攻榜第2位，季初狀態低沉嘅中場馬高列奧斯，最近對緬恩斯同奧格斯堡都有波入，無論多蒙特今場排咩陣，大家都唔使擔心佢哋會死火。
柏達邦火力有改善

另邊廂嘅柏達邦日前作客2:0擊敗柏林聯，連續2場喺德乙2球淨勝對手，證明新教練艾芬保有料到，加上佢喺球員時代做過拜仁慕尼黑隊長，對多蒙特肯定有敵對情緒，睇怕會吩咐班人同對手死過博爆冷，有機會趁多蒙特玩進攻足球，後防唔係太穩陣偷雞入波，玩入球大最過癮。