馮諾嘉手記：韋達充當虎威將軍

纯情小彩迷

　　之前提過一匹馬要贏晒三冠大賽難度好高，因為三關途程都唔同，要由1600米贏到2400米，至今只得「翠河」一駒能夠成功。不過，當年「翠河」之勇簡直冇馬可擋，先至可以創下非凡成就。至於剛啱贏出三冠頭關董事盃嘅「友誼至上」，以往最長都只係跑過1800米，睇嚟要贏埋餘下兩關，機會唔高。

　　至於香港速度系列（前稱短途錦標系列）就較容易出現王者，事關呢項賽事以往只集中跑1000同1200米，曾有三駒先後贏晒三關，對上一匹就係「精英大師」，呢隻馬曾先後響03/04年度同05/06年度馬季勝出三關賽事，戰績相當彪炳。

　　至於今屆速度系列首關百周年紀念短途盃，由「蓮華生輝」勝出，只要狀態保持得好，話唔定有機會創下佳績，贏埋餘下兩關賽事。

　　講番聽晚谷草賽事，頭場四班1000米，用「虎威將軍」做膽，上場跑谷草1200米響楊明綸胯下差啲爆出冷W，狀態回勇之餘，亦反映響四班有着數，今次強配韋達兼回師累積三冠一亞嘅1000米，可以作為重心看待，配腳拖番「喜在心頭」、「同心威駿」、「小蜜蜂」同「勁爆力」。

　　另外，第四場四班1650米，小妹揀咗「創新高」做膽，上場響郭爾達胯下開齋贏馬，人馬都發揮得唔錯，今次原庄人馬跑番贏馬路程，對手亦唔算太強，隨時添食。配腳方面，「引伸波幅」已經連仗試準，隨時郁手。「福到多多」用番巫斯義，可能有唔同演出。其餘拖埋「健康藍莓」同「新意思」。