J神 賓仔復出皇馬「-2」照撐

猪拉多纳

西甲「一哥」皇馬今晚主場出擊，喺巴拿貝恭候拉斯彭拉斯。「銀河艦隊」主帥賓尼迪斯賽前收到好消息，就係兩大攻擊主將占士洛迪古斯同賓施馬齊齊傷愈復出，加埋C朗攻堅，睇怕攻又唔得守又唔掂嘅拉斯彭馬斯都係聽炒，捧1.6倍「-2」嘅「讓球主勝」。

（now632台周六晚11:00直播）
拉斯彭馬斯攻守都唔掂

皇馬新季順風順水，一度陷入球荒嘅C朗，最近兩輪西甲都有波入，腳風順番晒。最重要係養傷接近兩個月嘅占士洛迪古斯，已經喺禮拜三聯同射手賓施馬齊齊復操，今晚有「J神」同「賓仔」拍住C朗衝鋒陷陣，今季作客場場有失波嘅拉斯彭馬斯都咪話唔大鑊。

睇死拉斯彭馬斯，皆因佢哋已經連續3場冇波入，想喺有比比復出嘅皇馬後防搵着數？難啲喎！況且拉斯彭馬斯新帥Setien不自量力，佢話「艦隊門神」基羅拿華斯今季有咁多機會表演，即係話皇馬條後防有問題，今鋪唔會坐以待斃，準備搵機會偷皇馬雞喎！皇馬至驚你龜縮，拉斯彭馬斯唔識死去到巴拿貝鬥攻，隨時輸得仲大鑊。