西布朗重兵布防 紅魔主場冇優細

猪拉多纳

連和3場0比0後，曼聯喺上場歐聯終於憑朗尼一箭定江山，主場小勝莫斯科中央陸軍1比0。「紅魔鬼」幾經辛苦先入到波，今晚英超再次喺主場出擊，迎戰由「護級專家」佩尼斯帶領嘅西布朗，睇怕又會老鼠拉龜，西布朗今場作客肯定係穩守大過天，捧入球細。

（now 621周六晚11時直播）

曼聯連續兩場聯賽失分兼冇波入，連英聯盃對住英冠仔米杜士堡打足百二鐘都入唔到波，最尾互射12碼更慘遭淘汰，攻力不濟成為致命傷，其中隊長朗尼喺前線隱形為人詬病，令紅魔猶如打少個。
控傳戰術唔奏效

去到周中歐聯，曼聯踢到79分鐘終於由朗尼建功打破入球荒，險勝莫斯科中央陸軍。不過咪諗住朗尼會因為呢個入球而鹹魚翻生，又或者呢場勝仗會令紅魔攻力大增，事關曼聯領隊尹戈爾主張控傳戰術，導致進攻效率急降，因為成隊波真係淨係識控同傳，射門少節奏慢，對手只要擺多啲人喺後場，真係好容易防守。

另一邊廂，西布朗領隊佩尼斯勝在有自知之明，每逢作客都會築起銅牆鐵壁，開咧後5仗聯賽客場僅1負之餘，全部開出入球細，其中4仗更能保清白之身，以曼聯目前疲弱嘅攻力，隨時會同西布朗悶戰一場，細盤乃不二之選。