捧挪威上盤有本有「利」

猪拉多纳

歐國盃附加賽首回合賽事今夜爆發，挪威主場硬撼匈牙利，挪威勝在年輕有活力，今仗趁住主場出擊，一於「chur爆」對方一班老將，挪威讓平半，要上盤！

（有線61及201台周五凌晨3時45分直播）

挪威一眾主力包括射手蘇達倫、隊長史基布特、防中堤迪，以及兩大新星馬古斯軒歷臣同馬田奧迪加特，前3者均28、29歲，正值黃金期，今次唔搏盡入歐國盃決賽周，等多4年就已經係職業生涯嘅黃昏階段嘞！至於16歲神童馬田奧迪加特仲係非常幼嫩，不過23歲嘅全能中場馬古斯軒歷臣就已經成為所屬球會阿爾克馬爾嘅主力，開季至今共取得7個職賽入球，其出色嘅閱讀球賽能力與精準傳送，係挪威最大嘅武器！
匈牙利老將多輸活力

相反匈牙利有多位核心球員都年過30，包括36歲嘅中場謝拉、32歲嘅後衞雲錫克，仲有39歲嘅首席門將基拿利，試問呢班「阿叔」今場點夠挪威一班後生仔鬥？而且匈軍更有中堅祖夏斯攞夠3張黃牌要坐波監。再睇埋兩軍對賽往績，原來挪威已經有成超過30年未輸過畀匈牙利，對上3次交戰挪威更係全勝，今場挪威上盤捧得過呀！