馮諾嘉手記：薛達志反彈 靠聚豪精英

纯情小彩迷

　    德國練馬師薛達志上季共獲24場頭馬，排於練馬師龍虎榜中游位置，但贏得獎金近3,200萬，成績理想，而上季黃汝安馬房只得12W成績麻麻，居練馬師榜包尾位置。但暑期一匹薛廐「好爸爸」轉倉，而安廐同時間得到多駒來投，令馬房壯大起來，可謂替目前練馬師榜中下游形勢埋下伏線。安廐最近搏馬頻頻得手累積九W，相反薛達志家陣只得四W，成為繼夏志信及卓普咸後，近年少有排榜尾之外籍練馬師。

　    「好爸爸」喺薛達志手上贏過無數大賽，兼成為世界一哩馬王，薛廐亦可以話憑此駒打嚮名堂，吸引不少馬匹來投，養馬量亦因而大增。暑期「好爸爸」要轉到告廐，大家都感到莫名其妙，更有唔少馬迷話馬王走咗，馬房必定倒楣，現在看來要讚他們未卜先知呢。

    　「好爸爸」今季亦愈跑愈好，早前更三連奪香港一哩錦標，同時間薛廐成績插入谷底，於龍虎榜排包尾位置，只有四場頭馬，自十一月頭至今已經三個月冇馬贏，難怪練者性情大變，兼且殃及池魚。

　    早前馬房已因些小事起風波，騎馬人人手一向係按養馬量而去計算，養馬量大減，馬會遲早會縮減人手，聽講有騎馬人怕了練者嘅脾氣，主動申請轉往其他馬房，正所謂「東家唔打，打西家」，今回輪到副練鍾占祺。聽講今次風波與廐內馬匹轉倉有關，但只要馬房有表現，想叫馬主轉倉都難，何況馬匹轉倉乃平常事呢。現時薛達志處境與上季黃汝安又有何分別，只要多贏頭馬必可翻身。

芙蓉威龍增程補中

　    回說初三賽事，薛達志可望憑五班1400米的「聚豪精英」取得久違勝利，以其上季尾於四班賽贏「福建王子」計，今次落五班出賽可橫掃，有信心替練馬師破悶局。另外，賀賢馬房「芙蓉威龍」上仗1400米姍姍來遲跑第二，今戰跑長二百米，對手難以抵擋。