烏克蘭學精 細守斯洛文尼亞

猪拉多纳

另一場歐國盃附加賽次回合，斯洛文尼亞主場再鬥烏克蘭。烏克蘭首回合領先2比0形勢大好，以佢哋今屆分組賽五場作客只失一球嘅超強防守，要守住攻力疲弱嘅斯洛文尼亞應該問題不大，1.59倍細盤可捧。

（有線62及202台周三凌晨3時45分直播）

烏克蘭過去五次喺大賽附加賽都落敗，其中最接近出線一次相信係2014世盃附加賽，當時烏克蘭對住法國首回合主場先贏2比0，點知次回合作客倒輸0比3出局，今次佢哋又再喺首回合主場領先兩粒，當然唔想再重蹈覆轍。

烏克蘭今屆分組賽十戰失四球，其中五場作客更有四場保持唔失波，唯一一場失波係以0比1不敵西班牙，可見防守極之穩健，而且吸取上次教訓，今次為保住勝果定必進一步加強防守。
斯軍火力差翻盤無望

斯洛文尼亞前線仍靠三十六歲老將路華高域衝鋒陷陣，活力欠奉，中場奇雲甘保爾、伊利錫又未成氣候，攻力難和當年嘅法國相提並論，要重演另一次大逆轉機會唔大，預計穩打穩紮嘅烏克蘭可順利過關，打破附加賽必敗宿命，首選入球細。