愛華頓fab four射爆水晶宮

猪拉多纳

樂壇「fabulous foursome」就係披頭四吖，咁球壇「fab four」又係邊幾位呀？同披頭四都係嚟自利物浦市嘅盧卡古、巴克里、迪路菲奧同史東斯，今季憑藉優異演出被封為「新fab four」。佢哋4個今晚率領愛華頓喺主場恭候水晶宮，「拖肥糖」出名係「周一惡霸」，而且隊波近況勇銳，小讓平半梗係撐1.74倍上盤！

（now621台周二凌晨4:00直播）

愛華頓老大哥巴利日前表示，環顧英超列強，根本冇一班22歲以下嘅生牯仔組合夠盧卡古、巴克里、迪路菲奧同史東斯咁堅，所以叫佢哋做「新fab four」絕冇誇張。咁又係嘅，佢4個雖然年紀輕輕，但已經係愛華頓主力，史東斯被譽為英格蘭未來正選中堅，盧卡古、巴克里同迪路菲奧更喺近5場賽事合力炮製11個士哥，當中迪路菲奧喺周中場聯賽盃1傳1射攞晒彩，Fit到漏油喎！
近15戰周一踢聯賽不敗

仲有呀，原來愛華頓踢周一波特別醒神，對上15次喺英超禮拜一出擊未輸過，錄得7勝8和佳績。況且隊長巴尼斯上周中傷愈復出，有呢位老大哥鎮守後防，加埋前面有近8仗入8球嘅「新魔獸」盧卡古衝鋒陷陣，有前又有後，水晶宮點頂呀？
水晶宮韋費特沙夏停賽

冇錯，水晶宮上場大炒紐卡素5:1，但「喜鵲」今季有幾沉大家有眼見，勝仗唔足以反映狀態。況且佢哋近7場波輸4場，近況根本唔係愛華頓嗰皮。今季喺邊路演出優異嘅韋費特沙夏，因為攞夠5張「牛肉乾」要坐波監，佢嘅替工巴卡利沙高亦養緊傷，領隊柏度隨時要搵李青龍或者班福特擔正，火力大受削弱，去到「拖肥糖」地頭莫講話全身而退，隨時蛋都破唔到呀！