禾堡漢堡打吡大駁火

猪拉多纳

德甲早場上演北部打吡，「工業城」禾夫斯堡（沃爾夫斯堡）主場迎戰「港口大城」漢堡，過去兩輪聯賽接連失分嘅禾堡，喺歐聯打爆曼聯勇闖十六強士氣返晒嚟，今晚主場出擊當然要全力追分；漢堡近排入得又失得，今仗中前場猛將復出亦唔會坐以待斃，預期係對攻好戲，大細中位數調整到2.5/3球唔算多，捧1.78倍大盤。

（now 670、有線64及203台周六晚10時30分直播）

禾堡近兩場聯賽連失五分，不過歐聯晉級後士氣大增，中場大將達斯拿終於顯示世界級球星風範，巴西中堅拿杜頭頂腳踢助攻力強，配合當弗嘅舒賀爾尼、巴斯杜斯同麥斯古斯，主場出擊威力極強；不過球隊今仗唔係冇隱憂，左閘列卡度洛迪古斯喺對曼聯一役受傷，今仗要由老將馬素舒希化代替，速度輸蝕，漢堡快翼尼古拉梅拿同伊利斯域分分鐘有機可乘。
漢堡夫添必盡砌

漢堡上輪主場1比3不敵緬恩斯，該役陣容嚴重不整，加上對手勁弗，但漢堡依然搶到唔少攻勢，唔好忘記漢堡喺呢場敗仗之前已經兩連勝，狀態唔差，何況今仗佢哋傷疲盡起，上仗因肩傷缺陣嘅強力箭頭拉蘇加，同曾經效力過禾堡嘅進攻中場肯特雙雙傷愈復出，前線齊番腳踢打吡戰實同禾堡駁火，大盤可捧。