奧格斯堡回勇可「特」圍

猪拉多纳

蜜蜂兵團跌Watt傷兵多

兩支歐霸盃32強分子奧格斯堡同多蒙特，今晚會喺德國盃第3圈碰頭。奧格斯堡最近突然勇猛，本土同歐洲戰場連贏3仗，由波巴迪拿領銜嘅鋒線更加唔講得笑，對住傷兵唔少嘅「蜜蜂兵團」有望發圍，受讓一球下，2.75倍「讓球主勝」要得過。

（TVB13周四凌晨3:30直播）
箭頭波巴迪拿有貨交

將會喺歐霸盃32強惡鬥利物浦嘅奧格斯堡，喺呢項盃賽有咁好發揮，皆因波巴迪拿Keep住有貨交。呢位巴拉圭射手今屆已經喺歐霸盃攻入6球，德甲亦有3球進帳，拍住具滋哲同艾斯雲攻堅，火力有番咁上下。球隊最近連贏3場，包括上輪聯賽以2:1勇挫史浩克04，創會以嚟首次擊敗呢支老牌勁旅，成班手足肯定個個心雄，務求打低埋多蒙特。
馬高列奧斯拉傷肌肉

「蜜蜂兵團」係技高一籌，剛啱仲喺德甲大勝法蘭克福4:1添，教練杜曹賽後話，希望班球員唔好鬆懈，藉住呢場勝仗重新起飛喎！咪忘記法蘭克福只係下游隊伍，成個下半場都踢少個，多蒙特大勝係應分，佢哋近6仗輸咗3場，表現明顯回落咗，冇季初咁銳。

最弊係「型男」鋒將馬高列奧斯又拉傷肌肉，今晚肯定唔出得，加埋中場紐尼沙軒同守將艾歷杜姆兩位十字軍，多蒙特有啲隱憂喎。再講吖，隊長曉姆斯今季判若兩人，演出時好時壞，今鋪隨時再成計時炸彈，今鋪多蒙特制唔過呀！