鳳凰平手盤有計

猪拉多纳

格食格坐和望贏

今年最後一場澳職，中岸水手主場對威靈頓鳳凰，包尾大幡水手衰到貼地，已經11場不勝，近6仗更全敗，更加唔好彩係遇上剋星鳳凰，兩隊近6次交鋒，水手錄得2和4負劣績，橫睇掂睇今仗都冇運行，平手盤必捧威靈頓鳳凰。

（有線64及203台周四下午4時直播）
中岸水手近6戰全敗

中岸水手自從開季首仗擊敗珀斯光輝之後，至今都未再贏過，期間11戰2和9負，即使主場亦3連敗，成為唯一得分仲係單位數嘅球隊，真係差到冇朋友。水手最大問題係防守勁曳，踢12場聯賽已失28球，比失球數字第2多嘅墨爾本城多出8球，防線可以話係處於崩潰邊緣，恐怕短期內難翻身。

至於威靈頓鳳凰雖然成績亦唔算叻，但勝在前鋒基舒拿腳風順，呢位斐濟國腳近4仗轟入3球。同埋鳳凰係中岸水手嘅大剋星，近6次對賽，鳳凰取得4勝2和，當中近4次作客鬥水手，都贏咗3次，以及1次打和 ，平手盤揀威靈頓鳳凰，基本上已立於不敗之地。