皇馬着火大舉進攻 作客華倫例演入球騷

猪拉多纳

西甲重頭戲，華倫西亞主場對皇家馬德里，「銀河艦隊」皇馬發炮非同小可，近兩仗共轟入13球，而且佢哋以往遇上華倫西亞攻得特別起勁，慣性上演入球騷。睇番皇馬近6次聯賽作客華倫西亞，有5次雙方合共炮製總入球達到5球或以上。因此，就算今場入球大細中位數調升至3/3.5球，Mic少亦決定捧入球大。

（now 632周一凌晨3時30分直播）

華倫西亞上仗作客0比1不敵維拉利爾，令到教練加利尼維利自領軍後，聯賽仲未成功開齋，不過「蝙蝠兵團」主場一向表現不俗，近10次主場僅於歐聯不敵里昂，發揮有保證。如果單計聯賽，華倫西亞今季8場主場更加未輸過，包括打和「地上最強」巴塞隆拿1比1，今仗返到自己「蝙蝠洞」作2016年第一擊，喺球迷打氣之下有能力同皇馬周旋到底。
C朗連續2仗起孖

皇馬教練賓尼迪斯為保帥位，開始大踢悅目進攻足球，近8仗贏7仗之餘，更加合共攻入34球，換言之平均每場入波超過4球，靠自己入波都夠開大，絕對有姿勢有實際。最重要係「銀河艦隊」每逢對華倫西亞都特別火猛，雙方慣性鬥攻，即使以中位數3.5球計算，近4次對賽都有3次開大盤。皇馬近6次聯賽作客華倫西亞，更加有5次總入球達到5球或以上，包括2011年4月皇馬大勝6比3，總入球更達9球之多。如今皇馬球星C朗大勇，已連續兩場西甲梅開二度，皇馬今仗唔愁冇波入，入球大值得追捧。