拖肥恨捧盃 頂得住曼城

猪拉多纳

今晚深夜有另一場英聯盃4強首回合大戰，愛華頓主場硬撼曼城，原來「拖肥糖」對上一次捧盃已經係21年前嘅事，主帥馬天尼斯賽前誓言要結束球隊冠軍荒，今仗主場出戰梗係唔可以輸，對住作客表現不穩嘅曼城，受讓值得捧場。（TVB 302周四凌晨4時直播）

自從喺95年捧起英足盃後，愛華頓就一直同冠軍無緣，對上一次最接近捧盃係09年嘅英足盃，喺決賽不敵車路士1比2，英聯盃更係從未染指過。今次嚟到英聯盃4強，領隊馬天尼斯表示對球隊有信心，可以一舉殺入決賽捧盃而回。其實擁有盧卡古、迪路菲奧、巴克里、史東斯等新星嘅「拖肥糖」實力一啲都唔曳，只係欠缺穩定性，今場只要發揮正常，把握主場之利，要擊敗曼城不是夢！
藍月亮作客飄忽難靠

曼城嘅隱憂除咗有隊長兼中堅高柏尼因傷缺陣外，作客表現飄忽亦係一大致命弱點，「藍月亮」近6仗作客僅得1勝，對榜尾嘅阿士東維拉贏唔到、對史篤城同阿仙奴更加輸埋，之前仲試過畀熱刺大炒4比1，上場聯賽擊敗屈福特2比1都係好險，若非耶耶托尼同阿古路臨完場連入兩球反勝，曼城肯定失分而回，今場面對戰意鮮明嘅愛華頓，曼城想贏真係唔易呀！