勝利開餐歎私房菜

猪拉多纳

水手頹爆 射手坐波監

今日澳職上演中岸水手於中立場鬥墨爾本勝利，水手近排可謂屋漏偏逢連夜雨，繼早前出現欠薪問題後，射手奧當路雲因向對手動粗被重罰停賽8場，最大鑊係水手近6次對墨爾本勝利錄得全敗收場，今仗凶多吉少。墨爾本勝利只讓一球唔過分，上盤照捧。

（有線64、203台周五下午4時40分直播）

包尾大幡中岸水手今季陷入低潮，輸波率近7成，成為唯一得分仍然係單位數字嘅球隊。雖然水手上仗擊敗威靈頓鳳凰，終止6連敗，但首席射手奧當路雲竟然用頭撼對手，被罰停賽8場，認真打擊士氣。鋒線失去大將，後防亦係隱憂重重，近5仗一共失咗13球，平均每場失近3球，受讓都信唔過。值得留意，澳職冇降班制度，所以水手根本唔會有危機感，求翻身嘅決心成疑。
勝利近6次交手贏晒

墨爾本勝利近6次對水手全勝，其中4場更淨贏2球或以上。今仗移師中立場維多利亞西蒙斯球場舉行，地理位置比較靠近墨爾本，勝利有着數。加上勝利射手貝利沙狀態大勇，近3仗有2球進帳，今季累積已轟入8球，以水手脆弱防線實難以招架這位前阿爾巴尼亞國腳，要贏兩粒難度不大。