施丹頭炮射爆拉科

猪拉多纳

皇馬新艦長施丹隆重登場！今晚西甲「銀河艦隊」皇馬主場迎戰拉科魯尼亞，亦係施丹從球王變為A隊教練「華麗轉身」第一擊，萬眾矚目，未開波已經充滿Noise。施丹揚言會大踢進攻足球，贏盡粉絲掌聲，C朗等眾將為博新帥歡心點會唔搏命呢？面對近況回落嘅拉科，皇馬勢必大勝一場為施丹響朵，就算要讓二球照撐1.78倍讓球主勝。

（now 632周日凌晨3時30分直播）

由一名傳奇球星變身主帥，總會充斥住歡呼及質疑聲；貴為球王級嘅施丹當然唔例外，一來今次係佢首度執掌職業球隊，仲要係全球響噹噹嘅「銀河艦隊」，難免備受懷疑。不過皇馬粉絲就High到暈，據報呢場施丹首騷嘅波飛一早被掃光，大家都對呢場波充滿期待，可見施丹掌帥所製造嘅熱爆效應。

而且前任主帥賓尼迪斯搞到皇馬立立亂，實在急需一名具感染力嘅人物主持大局，而施丹有如神級般嘅江湖地位，確可短時間內凝聚眾將軍心。施丹上任後講到明要大踢進攻足球，對於受「肥賓」保守戰術所限制嘅王牌C朗、賓施馬等大牌球星嚟講，絕對係一種釋放，合晒合尺。
拉科回落「+2」照反

拉科依家排西甲第7，同上季一直要為護級而戰乃天淵之別，多得射手盧卡斯佩雷斯弗到漏油，佢今季貢獻12個聯賽入波，更一度連續7場聯賽有士哥。可惜拉科近況明顯回落，近7場比賽只得1勝，面對急於爭功氹施丹嘅皇馬眾將，尤其係踏入2016年未開齋嘅C朗，拉科今仗難逃大敗厄運，讓球主客和皇馬要讓二球亦冇有怕，直取讓球主勝。