最激周中快車Top4大考驗

猪拉多纳

紅軍遇仙半場和好路

英超最激周中快車，Top 4殺到天昏地暗！今晚英超頭4隊嘅阿仙奴、李斯特城、曼城及熱刺齊齊登場，除咗「一哥」阿仙奴要造訪利物浦嘅大戰之外，李斯特城繼3日前英足盃後再火併熱刺，曼城要迎戰上周中喺英聯盃贏過佢哋嘅愛華頓，場場都係硬嘢，稍一不慎足以令排名大變，真係激到爆！

利物浦主場硬撼「一哥」阿仙奴，亦係高普首次以紅軍主帥身份，決戰兵工廠領隊雲格。同猶如管弦樂團指揮嘅雲格相比，高普被稱為足球場上嘅「重金屬狂人」，可謂「冷靜與熱情之間」嘅對決，阿仙奴忌憚對方快速反擊，作客環境唔敢輕舉妄動，但紅軍玩「重金屬」搞到傷兵一大籮，加上近9仗主場7度開半場和，半和值得捧場。

（now 621周四凌晨4時直播）
雙方傷兵太多唔敢亂攻

阿仙奴近6仗聯賽贏5仗，無疑係弗到漏油，但喺辛迪卡索拉、高基連、阿歷斯山齊士等主力長期養傷下，一直靠「地莊」捱過聖誕新年快車賽期，日前英足盃對新特蘭先畀梅迪薩卡同奧斯爾抖吓，但基奧特、艾朗藍斯、比利連等幾乎場場打足，都咪話唔攰，為免增加傷兵，預計雲格會叫眾將睇定嚟踢，唔使一開波即搶攻。另外，阿仙奴近期作客成績唔算標青，聯賽之前4仗作客，只得1勝1和2負，贏嗰場只係對包尾嘅阿士東維拉，其餘對手只係修咸頓、諾域治及西布朗，反映阿仙奴作客唔多穩陣。

利物浦喺「重金屬主帥」高普中途接手後，強調前場壓迫及快速反擊嘅高壓打法，雖有大勝車路士及曼城嘅佳作，但呢種打法對體力消耗極大，導致依家傷兵滿營，3線均有主力倦勤，其十字軍名單有前鋒史杜列治、中場大腦菲臘比古天奴、中堅史卡迪爾、洛夫雲，好多都係拉傷腿筋，今仗均不能上陣堅有影響，相信紅軍「攞正牌」泊大巴，睇準機會先打反擊，呢一點亦係阿仙奴所忌憚，兵工廠會盡量放慢節奏保持控球權，唔敢冒進。翻查利物浦近9仗主場有7仗開半場和，有晒攤路唔係唔跟呀？