半力紅軍難抗蓄銳精「兵」

猪拉多纳

傷疲交煎 高普頭痕

英超今晚繼續開快車，最受球迷關注嘅賽事，肯定係「紅軍」利物浦主場迎戰榜首「兵工廠」阿仙奴。利物浦家陣面對傷兵潮，就算球隊喺上仗足總盃收起大部分主力，今仗都不宜追捧。何況阿仙奴最近氣勢如虹，大有機會重奪英超錦標，加上助攻王奧斯爾復出派牌，相信阿仙奴有力贏多鋪，一於直取2.32倍客勝。

（now621台周四凌晨4:00直播）
利物浦傷兵超過10人

今日場波未踢之前，利物浦由12月開始已經踢咗10場比賽，令從未教過英超嘅領隊高普大叫頂唔順。又難怪嘅，紅軍陣中射手史杜列治、中場佐敦軒達臣、中堅洛夫雲等超過10人受傷。最新消息指原定有望今仗復出嘅前鋒奧歷治，因為康復進度唔理想，決定返比利時搵專家開刀治療，的確好難令高普唔頭痕。

雖然紅軍賽前收到好消息，中堅馬馬度沙高日前正式復操，話就話叫做有得解決球隊中堅荒，不過呢位守將抖咗咁耐，有冇足夠狀態守住同胞基奧特實屬疑問。況且利物浦只係得番中鋒賓迪基1個攻堅叫靠得住，攻不銳守不穩仲邊捧得過先？
阿仙奴奧斯爾弗到震

最重要係，阿仙奴中場奧斯爾、法米尼、守將梅迪薩卡、蒙利爾上仗休息，可以抖足今仗復出搏殺。須知道「大眼仔」今季勇不可擋，頻頻交出助攻，連領隊雲格都撐呢位德國中場下年有份挑戰金球獎。相信奧斯爾都會做齣 好戲報答雲格嘅信任，呢次對住傷疲盡現嘅利物浦，有力將晏菲路球場變成自己嘅舞台。