曼聯半場和快修錢

猪拉多纳

曼聯上個禮拜好威水，作客1比0擊敗死敵利物浦，近4場贏咗3場，但其實「紅魔鬼」呢幾場嘅表現係咪真係好好呢，科娜又唔覺囉！曼聯今晚回師主場鬥「聖人」修咸頓，「聖人」近期逐漸重拾狀態，今場作客勢擺鐵桶陣，相信至少頂到曼聯半場，最緊要係紅魔近11仗主場，有10次開出半場和，簡直係半和專家，值得繼續追。
主場出擊穩陣行先

曼聯喺悶蛋尹戈爾改造下，穩打穩紮踢法已成風格，控球為主，以守為先，派兩大防中舒尼達連同費蘭尼做防線第一道屏障，以往崇尚進攻、快速、肯冒險嘅「紅魔鬼」已經不復見。以大戰利物浦為例，以往由費格遜領軍嘅「紅魔鬼」，即使作客都唔會驚輸，誓要擊潰死敵，打死罷就，不過上場對住紅軍，曼聯幾乎全場被對手壓住嚟踢，無論控球率定射門次數都不及紅軍，但就靠住穩守嘅踢法保住不失，終於守到比賽尾段靠朗尼入球絕殺紅軍，攞晒3分。

不過，「紅魔鬼」即使返到主場，亦唔見得好進取，尤其係上半場更加唔敢谷得太上，睇番佢哋近11仗主場有10場開出半場和，當中更有9場更係開0比0，就證明紅魔係幾咁保守。
「聖人」回勇頂得住

修咸頓方面，由11月下旬輸畀史篤城開始，包括英聯盃及英足盃賽事，10場僅得1勝1和輸足8場，主帥朗奴高文甚至聞到魷魚香。不過「聖人」近期有回勇迹象，取得2連勝之餘更係一球不失，相信同首席門將費沙科士打抖咗10個月後復出有關，防守穩咗之餘亦成功振奮士氣。

修咸頓今場作客料會穩陣行先，新兵查理柯士甸今場或先列後備，下半場先登場同曼聯嚟真都唔遲，球隊近3次鬥「紅魔鬼」全部開出半場和，咁旺，唔係唔追吓話？