法蘭克福大到禾堡

猪拉多纳

德甲早場法蘭克福主場迎戰禾夫斯堡，法蘭克福教練艾明費向來係進攻足球支持者，陣中嘅「足球之神」美亞喺歇冬前已經重拾射門鞋，加上有匈牙利國腳中場侯斯迪加盟，今年首度主場出擊勢必主攻；禾夫斯堡教練赫基揚言下半季要改善作客成績，首要改變係要踢得更具侵略性，今仗預期係對攻好戲，大細中位數調整到兩球半、三球，真係濕濕碎，黑柴撐1.8倍大盤。

（now 670、有線61及64台周日晚10時30分直播）
美亞回勇 法福火力升

法蘭克福目前位列尾五，為提高實力，歇冬期喺中超長春亞泰簽入匈牙利國腳侯斯迪，唔好以為踢過中超就走下坡，事實上，32歲嘅侯斯迪仍處於高峰期，喺中超表現深受讚賞，而且得到多支歐洲尤其德甲球隊招手。何況法蘭克福王牌球星美亞已經成功克服傷患，歇冬前連續兩場聯賽入波，今年主場第一擊當然放開懷抱搶攻取悅餓波嘅支持者啦！

禾夫斯堡孭起富豪球會招牌，首循環只排德甲第7位相當失禮，而且外界傳出好多壞消息，話佢哋幕後大水喉大眾汽車將會縮皮，與此同時，球隊歇冬期不但冇增兵，仲高價賣走埋球隊三號中堅添姆高路斯，教練赫基回應傳媒話，禾夫斯堡人腳本身已經相當強，首循環失地源於作客不濟同踢得太保守，佢哋首循環作客成績排德甲倒數第二，8場作客只入4球更係德甲最少，赫基話呢個情況必須要作出改善，今仗到訪實力唔強嘅法蘭克福必須要搶攻，仲話唔介意失波，只要入得比對手多就得，以佢哋中前場包括達斯拿、舒賀爾尼、麥斯古斯同卡利古尼等一眾好手嘅級數，有力攻破主動出擊嘅法蘭克福大門。