紅軍守「細」抗史城

猪拉多纳

高普決心打造銅牆鐵壁

今晚上演英聯盃4強次回合比賽，利物浦喺首回合作客小勝史篤城1:0後，呢鋪回師主場再同對手鍊過。雖然紅軍近排後防表現令人提心吊膽，好在領隊高普已經搵到問題癥結所在，相信今仗唔會再咁蝦碌，而且紅軍踢盃賽防守查實唔係差，呢鋪對住火力有所回落嘅史篤城，幾難做大騷，一於直取1.78倍入球細。

（TVB301周三凌晨3:45直播）

利物浦上場聯賽險勝諾域治5:4，再加上早前同阿仙奴激戰至3:3，齋睇比數又難怪球迷對佢哋條防線冇乜信心嘅。賽後領隊高普亦鬥爆後防表現唔得掂，相信一班戰將呢鋪實會醒醒定定。但更重要嘅係，高普已經搵到紅軍防守出現咩問題。
踢盃賽防守唔曳

呢位激情領隊指出，紅軍之前對住曼聯同阿仙奴，都唔算畀咗好多機會對手，證明防線唔係乏善可陳：「其實我哋喺應付皮球落點嘅第一點唔曳，不過跟進第二點做得唔好，依家係時候解決呢個毛病。」踢波至忌唔知問題出喺邊度，既然家陣紅軍搵到答案，咁就唔怕佢哋冇改善。

話就話利物浦踢聯賽防守麻麻，但班波一嚟到盃賽又唔同講法。高普上任以來踢咗9場盃賽，當中5場零封對手，若然唔計喺英總第3圈副選盡出作客鬥埃克塞特一戰，呢9場比賽紅軍從未試過失多過1球，證明班波出戰盃賽集中力比聯賽好得多。加上紅軍家陣手握領先優勢，根本冇需要搶攻，更難上演入球騷。
史篤城鋒將啞火

對手史篤城踏入新一年後狀態轉沉，連英總擊敗英甲唐卡士打晉級在內，6場比賽取得2勝1和3負，更大鑊係球隊連續2場食白果。為咗爭取殺入決賽機會，已經復操嘅鋒將阿拿奧杜域，據講即使比賽狀態不足亦好大機會掛帥攻堅，弊在兩大主力保贊同梳頓沙基利齊齊陷入球荒，有一定死球威脅嘅高大中堅梳爾哥斯都打埋柴，真係要嗰件冇嗰件，呢鋪史篤城莫講話要反勝，就算想整番粒當安慰獎都難咯。