曼城遇惡客啃唔落

猪拉多纳

今晚繼續有英聯盃4強次回合比賽，輪到豪門曼城登場，返到主場迎戰愛華頓。「藍月亮」首合回不敵「拖肥糖」1比2，今場誓會傾力反撲，雖然呢隊波係地頭蟲，主場威力勁，近7主場錄得6勝1和，但唯一和波就係對「拖肥糖」。愛華頓近7場作客不敗，今場受讓1球，下盤捧得過。

（TVB 301周四凌晨3時45分直播）

愛華頓喺首回合難得搞掂曼城，將出線主動權掌握喺手，球隊對上一次殺入英聯盃決賽已係1984年嘅事，而95年足總盃奪冠後，亦有21年未捧過獎盃，為一圓冠軍夢，今場誓必將士用命，把握住大好優勢爭取進身決賽。「拖肥糖」上場英超不敵史雲斯，令人擔心今場對住實力再高幾班嘅曼城冇得打，但波係一場一場計，上場輸咗唔代表今場會兩連敗，加上今季嘅「藍月亮」表現並非好穩定，上場聯賽同韋斯咸打和，亦曾試過喺主場畀利物浦大炒4比1，本季英超主場亦只能同愛華頓打和0比0，證明「拖肥糖」今場唔係輸硬！
阿古路對親拖肥食白果

曼城睇落有好多大牌球星，阿古路、大衞施華、耶耶托尼、奇雲迪布尼等，但講到入波，咪又係靠晒「阿古獸」一個，上場和韋斯咸2比2，唔係靠「阿古獸」梅開二度，「藍月亮」分分鐘輸埋，連領隊比歷連尼都承認如果「阿古獸」再傷，曼城好難爭冠軍呀！

所以愛華頓今場最緊要睇實呢隻「阿古獸」，咁啱阿古路過去5次代表曼城上陣鬥「拖肥糖」，竟然1粒都入唔到，曼城連最強武器都廢埋，仲點贏先？愛華頓今季改善咗上季作客表現不穩嘅弱點，今季所有正式作客賽事，「拖肥糖」只係輸過1場畀阿仙奴１比２，今場受讓一球，梗係捧下盤喇！