曼聯擺大個頭打甩髀

猪拉多纳

防線殘缺唔攻仲死

今晚英格蘭足總盃第4圈，由曼聯造訪英冠球隊打比郡。紅魔今季不時面對傷兵問題，家陣後防仲成為重災區，多名後衞因傷避戰。咁啱今晚對手打比郡同樣不設防，既然雙方都冇穩守資格，以攻代守相信係雙方領隊最佳選擇，一於揀2.05倍入球大。

（開賽時間：周六凌晨3:55）

對曼聯嚟講，英超錦標稱得上已經提早投降，今季暫時只係得番歐霸盃同足總盃叫有得爭吓。不過前者強隊林立難度唔細，換言之足總盃已經係紅魔最有機會爭冠軍嘅賽事，相信唔會咁易放棄呢項賽事。

係，曼聯今季成日被人彈踢得悶，不過佢哋去到作客賽事，總算勉強維持到一定火力，近7場作客賽事一共攻入10球。特別係王牌射手朗尼表現復甦，近5場比賽射入5球，配合安東尼馬迪爾同桑馬達攻堅，火力仍有一定保證。

之但係紅魔今仗後防牌面堅曳，守將馬高斯盧祖、菲爾鍾斯、達美安、勞基梳爾等人統統有傷在身，令球隊焗住選擇派出小將麥尼亞、古利姆華利拿上陣。本身佢哋防守已經唔多穩陣，對上5場作客4鋪至少失守2次，家陣成條後防線搞到天殘地缺，就算有門將迪基亞把關都唔慌可以守得住囉。
打比郡攻強守弱唔會縮

打比郡同樣面對防線跌Watt問題，對上2仗接連被伯明翰、般尼大數3:0、4:1，不過領隊保羅基文迪賽前暗示無意變陣，強調球隊踢波風格係直接同進取，預料繼續以進取陣式4-3-3迎戰。講開呢位43歲領隊，原來佢過去曾經跟隨名帥安察洛堤學法，協助執教車路士、巴黎聖日耳門同皇馬，累積唔少應付歐洲豪門經驗，亦曾以教練身份幫車路士2奪足總盃冠軍。何況鋒將安祖斯韋文、守將禾諾克等人均具備英超比賽經驗，呢鋪肯定有資格為曼聯防線製造唔少麻煩。