ＦＣ悉尼當起恰獅吼

猪拉多纳

今日澳職激戰連場，FC悉尼主場迎戰布里斯班獅吼，最值得留意。FC悉尼雖然排名較低，但主場3連勝，而且獅吼防線穿窿，連輸兩仗兼狂失8球，敗象已成，「讓球」有得受讓平半都制唔過，一於順勢捧FC悉尼上盤。

（有線64及203台周六下午4時30分直播）

目前澳職爭逐激烈，前5位球隊咬得好緊，排第5位嘅FC悉尼更加要急起直追。佢哋近況勇猛，早前仲作客擊敗勁旅西悉尼流浪者，加上FC悉尼主場表現可靠，3連勝之餘，一共轟入7球只失1球，可謂攻守兼備，值得睇好。

反觀第3位嘅布里斯班獅吼表現走下坡，已經連續3仗不勝，近兩仗分別吞墨爾本勝利4蛋，同埋1比4大敗於阿德萊德聯腳下，信心大受打擊。進攻方面亦唔掂，近3戰只能靠射手軒歷基安達迪射入1球12碼，以現時情況，估計無力喺FC悉尼身上搶分。
光輝勝利「大」激鬥

另一場，珀斯光輝主場對墨爾本勝利，光輝上仗大勝紐卡素噴射機6比1，攻力非常犀利。不過，墨爾本勝利狀態亦大勇，近4仗取得3勝1和，雙方應會一番激鬥，捧入球大。

（有線64及203台周六晚6時40分直播）