哥迪奧拿今夏入城

猪拉多纳

曼城昨晚官方正式宣布，經過幾個星期嘅商議，哥迪奧拿答應下季開始出任曼城領隊，雙方簽約3年，將會頂替今季完結後提早離任嘅比歷連尼，比帥於14年為曼城贏得英超及英聯盃雙料冠軍。曼城聲明指出，比歷連尼支持球會嘅決定，並且會繼續於球季餘下為球隊爭取錦標。

哥迪奧拿早於去年12月宣布，球季結束後會離開拜仁慕尼黑，當時盛傳曼城、曼聯及車路士均對呢位巴塞隆拿出身嘅教練虎視眈眈，終於昨日曼城宣布成為大贏家。曼城聲明表示，過去幾周雙方作出多次傾談，聲明更指出，與哥迪奧拿早於2012年傾過接手問題。不過當時哥帥離開巴塞後決定小休，之後轉投拜仁令曼城失望而回。
簽約3年 來季正式上任

比歷連尼昨日出席周中英超快車記者會時宣布自己會離開，其後不夠半小時，官網就宣布哥迪奧拿接任。比帥指自己早於1個月前得悉，希望依家所有傳言及猜測可以停止，讓佢專心為球隊爭標。
作客新特蘭「大」無畏

至於今晚「藍月亮」作客護級球隊新特蘭，曼城上周末喺英足盃作客大勝維拉，表面上好威風，查實單計聯賽佢哋今季作客11戰只得4勝，當中近8場只係贏過屈福特。睇番佢哋對上5場作客賽事，除咗兩場英足盃對住實力一般嘅維拉及諾域治，其餘聯賽對韋斯咸及屈福特、英聯盃4強首回合對愛華頓都係先失波一方，好彩佢哋前鋒交到功課先至大步檻過。比利時中場奇雲迪布尼繼續因傷倦勤，不過阿古路、史達寧、甚至上仗對維拉大演帽子戲法嘅伊恩拿祖都夠弗，以攻代守似乎仲實際。

新特蘭目前以19分排聯賽榜尾二，同尾四嘅諾域治有4分距離，為護級每仗都要搏到盡，佢哋近況唔錯，近4場聯賽2勝1和1負，前鋒迪科爾同左閘雲安荷特仲包辦晒9個士哥，腳風極順，面對缺少高柏尼嘅曼城防線隨時有雞偷。雙方近年交手亦慣性多入波，近6次對賽總入球均達4球或以上，今仗中位數不變維持2.5球，大盤最值博。

（now 623周三凌晨3時45分直播）