曼市殺手出關 史篤城唔赦紅魔

猪拉多纳

「方丈」淨識認叻信唔過

能夠喺一季內同時擊敗曼市雙雄嘅球會唔多，若然呢支只係中型班球隊就更加難得。史篤城今季喺主帥曉士帶領下化身為「曼市剋星」，先後技術性打敗曼城同曼聯。今晚佢哋喺英超造訪紅魔，有埋「曼市殺手」阿拿奧杜域復出擔大旗，以曼聯主場疲弱嘅攻擊力，睇怕都幾難砌低對手，2.27倍「讓球客勝」值捧。

(now 632周三凌晨4:00直播)

史篤城今季2次鬥曼市雙雄全部贏晒，堅係威喎，2次均以2:0輕取對手，可見班波唔係靠運，係以真材實料贏波。當中合共射入3粒嘅鋒將阿拿奧杜域，今仗會復出攻堅，自然令史篤城搶分機會大增。
主場死火 奧脫福變「悶劇場」

況且，曉士近年對住曼聯確係有計，對上4次鬥紅魔，有3次保持不敗。球隊為咗喺今仗威多鋪，上場足總盃鬥水晶宮只係半力出擊，鋒將約拿芬禾達斯、中場阿費利、格連韋倫、守將格連莊臣、門將畢蘭特全部休息，養精蓄銳抖足精神，足以同曼聯一拚。

奧脫福球場過去齋靠個名，都足以嚇窒一眾中下游球隊，不過班波今季喺領隊尹戈爾帶領下銳氣盡失，昔日「夢劇場」更已經淪為「悶劇場」，紅魔今季11次聯賽主場出擊，只係攻入12球排喺聯賽尾2，咁曳嘅火力嚇得邊個先？

曼聯領隊尹戈爾帶唔起隊波之餘，偏偏仲要自欺欺人唔認清球隊實力，早前僥倖作客砌低利物浦1:0後，「方丈」竟然勁大口氣話球隊係時候重新振作爭冠軍，點知下一場即喺主場輸畀修咸頓0:1貽笑大方，紅魔近年對史篤城已經冇着數，呢場仲要讓波？牙煙啲喎！