緬恩斯史浩克強細交鋒

猪拉多纳

防線氣袋Vs掃蕩天王

今晚德甲獨腳戲緬恩斯主場迎戰史浩克04，兩軍近況大勇，同樣挾兩連勝兼冇失波嘅強勢而臨，今仗預期會係一場拉鋸戰，入波唔會多，黑柴推介1.88倍細盤。

（now 670、有線61及201台周六凌晨3時30分直播）

緬恩斯目前居聯賽榜第7，以3分壓住富豪球會禾夫斯堡，近期連贏兩場1比0，防線表現最出色。前仗力克勁旅慕遜加柏，經統計全隊跑咗125.2公里，刷新球隊今季紀錄，當中防守中場丹尼拿迪沙一個人已經跑咗13.8公里，賽後被冠以「馬拉松氣袋」綽號。除咗佢之外，門將卡利奧斯嘅神勇表現亦令慕遜加柏鋒將望門興嘆；到上仗作客漢諾威，就輪到另一防中巴姆特寧加玩晒，佢喺中場掃蕩威風八面，搶到漢諾威頻頻斷纜，成為防線第一道屏障。不過，佢哋嘅首席射手武藤嘉紀上仗傷出，賽後檢查證實韌帶受傷要抖幾個禮拜，球隊鋒力削弱，今仗面對名牌對手會以穩為先。
祖利亞迅即成球迷至愛

史浩克近期連接擊敗達斯泰特同禾夫斯堡，兩仗亦保持零失球，尤其上場大勝禾堡踢出今季代表作。佢哋防線傷兵雖多，但新加盟嘅巴西守將祖利亞卡卡拉憑優異演出，迅速俘虜晒球迷嘅心，每次出場特別多掌聲，門將費文既穩健亦不時作出精彩撲救，令防線愈踢愈穩陣。史浩克亦啱啱收到好消息，養傷中嘅隊長賀維迪斯終於揮筆續約到2020年，呢位球隊精神支柱決定長留史浩克，對全隊鼓舞甚大。今場兩軍旗鼓相當，細盤係投X首選，求好分可以博埋3.25倍和局。